هل من الغريب وسط حادث كارثى مثل حادث قطارى العياط المتكرر والاخير أن يذهب أحد الوزراء المعنين بإدارة الازمة الى الجيم دون إكتراث بالفاجعة .. لدرجة ان من شاهدوه وهو يدخل الجيم إنصدموا!!.
هذا حدث بالفعل فأحد الوزراء المعنين بإدارة أزمة حادث قطارى العياط دخل الجيم المعتاد ارتياده بشكل منتظم وهو جيم ملحق بأحد الفنادق الفارهه بالتجمع الخامس بعد ساعتين أو ثلاثة من وقوع الحادث.
عربات الاسعاف كانت تنقل المصابين الله يشفيهم والموتى الله يرحمهم .. طب هي كارثة زي دي بتبقى محتاجة شخصية زي قالب الثلج عشان يعرف يتصرف و لا حد بيحس بالم الناس فيشتغل اكتر ويتفاعل معاهم .. انا احترت الصراحة و اللي محيرني اكتر ان برنامجين للتوك شو أمس مسخرين غالبية وقت البرنامج للدفاع والتبرير عن وزير النقل ما بين انه مش هو اللى سايق القطر ومابين ان حوادث القطارات انخفظت من ٢٠٠١لـ ٢٠٢٥.
تقدير الموقف بقي زي ياسين اللي اتقتل و بهية مخبرتناش مين اللي قتله .. السود عنيا ولا السودانية من فوق ضهر الهجين … احنا كل مادي بنزود الفجوة بين الـ ٢٥ مليون اللي هما مستقبل مصر واللى بتحاول الدولة بكل الطرق الممكنة ما يبعدوش عن تاريخنا ولا جغرافيتنا ولا لغتنا العربية فلما بيشوفوا جيل الماضي بيطرح الكوارث بالطريقة دي .. وان الهم كله الوزير محدش يضايقه ولا حد يزحزح كرسيه ان شالله يموت كل ركاب القطرين فطبعاً عليه العوض فى تحجيم الفجوة.. و يجى يقولولك ما اليابان والصين وكل الدول المتقدمه بيحصل فيها حوادث والمفروض يا ناخد تجربة الدول كلها اللى بنقارن نفسنا بيها فى المصايب لا بلاش.
ولما بسمع اللي بيتكلموا بالا منطق ده
افتكرت مقالة شهيرة لاستاذنا الراحل محمود صلاح .. كانوا مستضيفينه فى برنامج صباح الخير يا مصر فقرة الصحافة و كله عارف ان الرئيس الراحل حسنى مبارك كان بيحب يتفرج على البرنامج ده .. المهم المذيع سأل استاذنا الراحل – كبير صحافة الحوادث فى عصره – ايه الاخبار يا استاذ محمود .. فرد الاستاذ والله الاخبار مش حلوة فى بيت وقع فى شبرا وبيت وقع فى الاسكندرية وكانت فقرة سواد .. المهم الرئيس مبارك كلم محمود صلاح وهو خارج من التليفزيون وقاله يا محمود كل البلاد بيحصل فيها نفس الحوادث ولسه فيه عمارة كانت واقعه فى الصيين وقطر مقلوب فى الهند .. وفضل الرئيس يناقش محمود صلاح بنفس اللامنطق والمقارنة بينا وبين الدول الاخرى .
فرط الحديت
بس للاسف محدث بيتابع الدول الاخرى بتعمل ايه من اجراءات بعد ما تحصل كوارث زى دى .. فى الصيين اذا مكنش بيتعدم المسئول لتقصيره فمصيره السجن مش حنقول بيعزلوه بس من منصبه عشان يبقى عبره ومحدش يجرى ع المنصب غير لما يكون متاكد انه كد المسئولية وكد الادارة .. الموضوع مش عند .. احنا قدام ارواح ناس اتبعترت على الارض واللى ظاهر ومتصدر ان الوزير مش غلطان.. ومش مسئول.
