نص أمر الإحالة والتحقيقات
رمضان صبحي: لا أعرف مكان المعهد والمتهم الأول يعترف بدخول الامتحان مجانا
بعد إحالة نيابة جنوب الجيزة الكلية، رمضان صبحي، لاعب نادي بيراميدز، إلى المحاكمة أمام محكمة الجنايات بتهمة التزوير داخل معهد الفراعنة للسياحة والفنادق بمنطقة أبو النمرس، صحبة 3 متهمين آخرين، كشف أمر الإحالة في القضية وأقوال اللاعب "المتهم الثالث" والمتهم الأول عن العديد من المفاجآت.
وجاء في نص أمر الإحالة الصادر في قضية رمضان صبحي، رقم 6407 لسنة 2025 جنايات مركز الجيزة، والمقيدة برقم 528 لسنة 2025 كلي جنوب الجيزة، في قضية تزوير محررات رسمية لدخول امتحانات معهد الفراعنة العالي للسياحة والفنادق، أن أسماء المتهمين في القضية هم: يوسف م س ي، 23 سنة، عامل في مقهى (محبوس)، ومحمد إ عبد إ، 27 سنة، مشرف أمن بالمعهد (محبوس)، ورمضان صبحي، 28 سنة، لاعب كرة قدم بنادي بيراميدز (مخلي سبيله)، وطارق م م ص، 45 سنة، مالك مقهى (هارب).
واتهمت النيابة المتهم الأول بتحرير كراسات إجابات تخص مواد الفرقة الثالثة في معهد الفراعنة العالي للسياحة والفنادق، والتوقيع عليها بتوقيعات مزورة منسوبة للاعب رمضان صبحي، مستهدفا إثبات حضوره لأداء الامتحانات، بمساعدة باقي المتهمين.
واتهمت النيابة أيضا المتهمون بالاشتراك مع آخر مجهول وموظفين حسني النية في استخراج قيد مزور، لإثبات اجتياز رمضان صبحي للفرقتين الأولى والثانية، والتحاقه بالفرقة الثالثة بالمعهد، وهو ما يخالف الواقع.
كما كشفت أوراق القضية عن أن رمضان صبحي والمتهم الرابع اشتركا مع مجهول في تزوير كراسات امتحانات الفرقة الأولى، عبر إمداده بالبيانات اللازمة، وتحرير الأخير للإجابات ونسب التوقيعات زورا للاعب، كما تم التلاعب في كشوف الحضور الخاصة بالفرقة الأولى لإثبات مشاركة اللاعب، وهو نفس السيناريو الذي حدث مع كراسات الفرقة الثانية، والتي تم تحريرها والتوقيع عليها بتوقيع مزور منسوب لرمضان صبحي، كما شملت عمليات التزوير كشوف الحضور الخاصة بالفرقة الثانية، وذلك للإثبات حدوث واقعة غير صحيحة على أنها رسمية.
واتهمت النيابة المتهمين بارتكاب الجناية المؤثمة بالمواد 40 (ثانيًا وثالثًا)، 211، 212، 213، 214، 214 مكرر، 206/1، 41 مكرر من قانون العقوبات.
وأمرت النيابة بإحالة القضية إلى محكمة جنايات الجيزة بدائرة محكمة استئناف القاهرة، واستمرار حبس المتهمين الأول والثاني على ذمة المحاكمة، وسرعة ضبط وإحضار المتهم الرابع وحبسه احتياطيا، وفي وقت سابق، قررت النيابة إخلاء سبيل رمضان صبحي، بكفالة مالية 100 ألف جنيه.
أقوال رمضان صبحي
أما عن أقوال رمضان صبحي أمام تحقيقات النيابة، فجاء نصها كالتالي:
س: الاسم بالكامل؟ والسن والوظيفة؟
ج: رمضان صبحي رمضان أحمد، ٢٨ عامًا، اعمل لاعب كرة قدم.
س: ما ظروف نشأتك الاجتماعية تحديدا؟
ج: أنا نشأت في أسرة مكونة من أبويا الله يرحمه وأمي وإخواتى أخت شقيقة وأخين ثلاث بنات من والدى من زوجة تانية وأخ من والدتى من زوج آخر.
س: ما هو مؤهلك الدراسي تحديدا؟
ج: أنا حاصل على الثانوية العامة في عام ۲۰۱٦ تقريبا والتحقت بعد كدة بأكثر من معهد لحد معهد الفراعنة العالي للسياحة والفنادق.
س: في أى عام تحديدًا حصلت على مؤهل الثانوية العامة ؟
ج: عام ٢٠١٦ تقريبا.
س: ما هي جهة حصولك على ذلك المؤهل الدراسي؟
ج: من مدرسة الأندلس الثانوية في أرض اللواء - بولاق الدكرور.
س: هل التحقت بأى معاهد عقب حصولك على مؤهل الثانوية العامة؟
ج: أيوة أنا كنت مقيد بالمعهد العالى لعلوم الحاسب ونظم المعلومات "CIS" ومقره التجمع.
س: هل المعهد سالف البيان ذات التخصص لمعهد الفراعنة للسياحة؟
ج: لأ.. هو الاتنين مختلفين تقريبا وأنا معرفش تخصصهم إيه بالظبط.
س: هل قمت بالالتحاق بمعهد الفراعنة العالي للسياحة ؟
ج: أيوة
س: من أي المعاهد تحديدًا قمت بالتحويل للمعهد الفراعنة العالى للسياحة محل الواقعة؟
ج: أنا حولت من المعهد العالى لعلوم الحاسب ونظم المعلومات "cis".
س: ما هو التخصص الخاص بالمعهد العالى لعلوم الحاسب ونظم المعلومات؟
ج: أنا مش عارف.
س: ما الذى يحول دون وقوفك على تخصص المعهد سالف الذكر؟
ج: لأني بعد الثانوية العامة سافرت إنجلترا وكنت مضطر أقيد في معهد وأنا مش عارف التخصص؛ لأنى الفترة كلها حوالى سنتين ونص مرحتش وبالتالي كان إجباري عليا أحول لمعهد تاني.
س:هل صدرت لك ثمة نتائج بالمعهد ؟
ج: لأ.. لأني مرحتش غير مادة واحدة وهى مرة واحدة اللى رحت فيها المعهد وبعدين سافرت تانى.
س: هل استمريت بالدراسة والتحقت بالسنوات التاليات به تباعًا؟
ج لأ.. لأنى مرحتش غير مرة واحدة ومدخلتش غير مادة واحدة.
س: متى تحديدًا قمت بالتحويل من المعهد العالى لعلوم الحاسب ونظم المعلومات "cls" بالتجمع للمعهد الفراعنة العالي للسياحة؟
ج: تقريبا عام ۲۰۱۹ أو ۲۰۲۰ وانضممت للفرقة الأولى.
س: هل انتظمت بالدراسة فى معهد الفراعنة العالى للسياحة؟
ج: المفروض أني مقيد بس أنا مرحتش ولا مرة.
س: هل انتظمت في أداء الامتحانات والمطلوب منك بصفتك طالب به شأنك شأن أي طالب مقيد بذات المعهد ؟
ج: أنا مرحتش ولا مرة ولا أعرف طريقه فين.
س: هل أديت ما هو مطلوب منك من أبحاث ودراسات خاصة بالمعهد للتحصل منه على نتائج ؟
ج: أنا مرحتش ولا مرة ولا اعرف طريقه فين زى ما قلت.
س: هل صدر لك أي كارنيهات أو إثباتات قيد وما من شأنه تسهيل سفرك ذهابًا وإيابًا وفقًا لطبيعة عملك ونشاطك الرياضي؟
ج: أنا مشفتش أی کارنيهات ولا رحت المعهد نهائي ولا دخلت أى مادة وأنا كنت باخد إثباتات القيد علشان أسهل إجراءات سفرى واللى كان بيجبهالى كان واحد اسمه طارق المصرى.
س: هل كنت دائم التحصل على إثباتات القيد من المعهد الفراعنة العالي للسياحة؟
ج: أيوة
س: فيم كان استخدامك إياها؟
ج: كانت إجراء ضرورى من إجراءات سفرى للخارج.
س: هل استخدمتها في تقديمها لثمة جهات رسمية؟
ج: أيوه.. كنت بقدمها في منطقة التجنيد والجوازات وموضوع إني بسافر عشان معسكرات التدريب وكنت بستخدمها في استخراج تصاريح سفری.
س: هل تحصلت على تلك الإثباتات بشخصك؟
ج: لا أنا كنت بجيبها من اللى اسمه طارق المصرى وده كان ما يخص سفريات النادي والمنتخب من خلال إدارى النادى عندى ولما كانت سفريات خاصة بيا أنا كنت باخدها منه بنفسى أو كنا بنتقابل تحت البيت عندى واخدها أو يسبها مع أحد الإداريين بالنادي وآخدها منه.
س: ما هي كيفية تحصلك على تلك الإثباتات؟
ج: أنا اللي أعرفه أنها كانت بتطلع من المعهد لكن طارق هو اللى كان بيجبها.
س: من الذي كان يساعدك في الحصول عليها؟
ج: طارق ا.
س: ما هي كيفية مساعدته لك في ذلك الشأن تحديدا؟
ج: كان بيروح المعهد ويتعامل وكان بيجبلى اثبات القيد وانا معرفش ! غيره في الموضوع ده.
س: ما هي السنة الدراسية والفرقة الدراسية التي وصلت اليها تحديدا ؟
ج: معرفش أنا وصلت لسنة كام بالظبط.. لأنى مرحتش ولا مرة وكان كل الموضوع في إثباتات القيد لتسهيل السفر وكان طارق بيجبهالي فمكنتش بسأله
س: هل مثلت بالحضور جميع الامتحانات الخاصة بالمعهد الفراعنة العالي للسياحة؟
ج: أنا مرحتش ولا مرة.
س: هل قمت بالحضور والكتابة والتوقيع في كافة كراسات الإجابة الخاصة بك وأداء الامتحانات في الفرق الدراسية بالصورة الطبيعية؟
ج: لأ أنا مرحتش ولا مرة.
س: كم عدد المرات التي قمت بأداء الامتحانات والحضور تحديدًا ؟
ج: أنا مرحتش ولا مرة ولا أدیت أي امتحانات هناك ومعرفش أي حد من العاملين، ولا أعرف المعهد فين.
س: ما هي علاقتك بأعضاء هيئة التدريس ومعاونيها ؟
ج: أنا معرفش فيهم أى حد.
س: هل تقف على أشخاصهم وهل من ثمة علاقة فيما بينك وبينهم ؟
ج: أنا برضو معرفش فيهم أى حد وكل علاقتى بالمعهد إثباتات القيد اللى كان بيجبهالي طارق المصرى.
س: ما هي بيانات طارق ا تحديدا؟
ج: أنا كل اللى أعرفه عنه أن اسمه طارق ا ومعرفش اسمه بالظبط إيه ولا سكنه فين، هو المفروض إنه شغال وكيل لاعبين كورة وتسهيل انتقالهم بين الفرق والنوادى والاحتراف وممكن نقول سمسار لاعيبة لأنه ممكن برضو يجيب عقود وهكذا.
س: ما هي بادرة تقابلك تحديدا معه؟
ج: هو أنا بعد ما رجعت من إنجلترا عام ۲۰۱۹ الكابتن محمد الشناوى عرفنى عليه وهو مكنش على تواصل كبير معايا وميعرفشي حاجة هو وصلني بيه كصديق بس وكان في عام ۲۰۱۹ تقريبا ومن ساعتها مكلمناش بعض حتى ومش بنتقابل غير مع بعض في الماتشات.
س: ما علاقتك تحديدا بسالف الذكر؟
ج: أنا وقتها كنت في النادى الأهلي وعلاقتی بیه كانت بخصوص فقط قيدى في المعهد واستخراج إثباتات القيد ومكنش بيحصل بينا مكالمات كتير غير أنه كان بيطلب فلوس لكل ترم وأنا ببعتهاله وكان ممكن يرن عليا ونتواصل في الأعياد وكان كل ما بحتاج اثبات قيد بكلمة ومكنش ليا بيه أى علاقة جامدة أو شخصية ومفيش غير موضوع المعهد بس.
س: هل أخبرك المتهم طارق المصرى بالتحاقك بمعهد الفراعنة العالى للسياحة والفنادق وقيدك فيه على وجه رسمي وتنقلك مابين السنوات الدراسية المختلفة ؟
ج: هو كان بيتواصل معايا كل ترم ويطلب فلوس لكن مكنش بيقولى أنا في سنة كام، وكان بياخد منى ٣٠ أو ٤٠ ألف جنيه كل ترم ودة من بداية عام ۲۰۱۹ أو ۲۰۲۰ مش متذکر بالظبط، وكان بياخدها كاش وبعدين بقيت بحوله على برنامج انستا بای.
س: هل من ثمة إيصالات دفع أو ايصالات تحويل تحصلت عليها منه؟
ج: لا أنا بس كنت باخد منه إثباتات القيد فقط لاغير وحتى التحويلات كانت الأخيرة على انستا باي.
س: من أی هاتف جوال كنت تقوم بأرسال تلك المبالغ له؟
ج: من على تليفوني.
س: أين ذلك الهاتف المحمول خاصتك؟
ج: هو مع شريف إكرامى أخو مراتى علشان لما وقفونى في المطار أخد متعلقاتی خلاها معاه.
س: ما الذي حال دون وقوفك على حالتك وموقفك الدراسى في المعهد محل الواقعة؟
ج: أنا مسألتش لأننا كان كل اللى يهمنى اثباتات القيد علشان اسافر وانى أكون مقيد بمعهد ومبقاش آخر مؤهل بالنسبة لى الثانوية العامة علشان تقديم اولادى بالمدارس والمظهر الاجتماعي.
ضبط رمضان صبحي
س: ماهي ظروف ضبطك؟
ج: اللى حصل أنى كنت في معسكر تدريب في تركيا وبعدين أول ما وصلت المطار قبضو عليا وجابوني انهاردة على النيابة ودة اللى حصل، وكان معايا شريف إكرامى أخو زوجتى وراجعين مع بعض، واخدونى من المطار وقالولى ان فيه تشابه أسماء وبعدين جالى واحد ظابط وقاللى اتفضل معانا وقعدت في اوضة لحد ما قوة جت واخدتنى على مركز شرطة أبو النمرس.
س: ما علاقتك بـ محمد إ ع الشهير "بالعمدة"؟
ج: أنا معرفوش ولا رحت المعهد مرة واحدة حتى ولا اعرف المعهد نفسه فين.
س: هل دار بينك وبين المتهم طارق ا ثمة حوار أو أبرمتم أى اتفاق بشأن تحصلك على الشهادة الخاصة بالمعهد؟
ج: هو أنا مش مهتم أساسا بالشهادة وكان كل اهتمامى انى اخد اثبات القيد علشان اعرف اسافر والمظهر أنى مقيد في المعهد مش ثانوية عامة وفى نفس الوقت هو كان بياخد مبلغ قليل حوالي ٣٠ أو ٤٠ ألف جنيه في الترم ومكنتش بسأله كتير ولا قليل وكان كل اللى بيهمنى يجيب إثبات القيد ومسألتوش أنا في سنة كام لأنى كل اللى فاكره أنه بيأجلى فمكنتش بسأله على أى حاجة لأن مصلحتى ودنيتى ماشية في إثبات القيد وبسافر براحتى ومقيد بمعهد عالى.
س: هل قمت بالاطلاع على أي إثبات قيد والسابق صدورها من المعهد محل الواقعة ومراجعة بياناته؟
ج: لأ انا مكنتش براجع حاجة لأنه كان في الاغلب الإداريين بتوع النادى هما اللى بيستلموه ويخلصوا معاه والإدارة العامة للتجنيد علشان يجيبو تصاريح السفر وعلشان كدة مادام مصلحتى ماشية مكنتش بسأله.
س: ما الذي حوته تلك الإثباتات وما مضمونها؟
ج: كان مضمونها أني مقيد في المعهد.
س: كم عدد إثباتات القيد التي قمتم بأستخراجها تحديدا؟
ج: عدد كتير من بداية ۲۰۱۹ أو ۲۰۲۰ ولكن أنا مش متذكر العدد بالظبط وأنا برضو بقالى سنتين ماخدتش إثباتات قيد لأنى أخدت شهادة اعفاء نهائي من الجيش، ومش فاكر بالظبط كان اخر اثبات قيد امتى بس ممكن يكون ساعة ما كنت بجدد البطاقة بتاعتى وبنقل من أرض اللواء لسكني الجديد.
س: قررت سلفًا بعدم استخراجك اثباتات قيد منذ استخراجك لشهادة الإعفاء النهائي في حين إقرارك باستخراج اثبات قيد حال استخراجك لبطاقة الرقم القومي وتجديدها ؟
ج: أنا ممكن أكون استخرجته وأنا بطلع البطاقة بس مش متاكد قدمته وفيها ولا لأ.
س: متى تحديدا آخر تاريخ قمت فيه بتحويل ثمة مبالغ مالية للمتهم طارق محمد محمد صالح ؟
ج: أنا آخر حاجة كانت في بدايات عام ٢٠٢٥.
س: هل كانت بحوزتك شهادة الاعفاء النهائية؟
ج: أيوة.
س: ما الباعث والدافع تحديدا من استمرارك بتحويل مبالغ مالية الى المتهم طارق محمد محمد؟
ج: أنا كنت بحوله الفلوس على أساس أنى افضل مقيد في المعهد لأن ابنى مقدم في المدرسة فلازم يكون للأب مؤهل دراسى وابنى الثانى هقدمله فكنت محتاج أنى افضل مقيد في المعهد وأنا كنت فاكر أن طارق بيأجل لى الامتحانات ومعرفش هو كان بيعمل ايه بالظبط وأنا بعد ما ابنى الثاني كان هيدخل المدرسة وهو باقيله سنتين ويدخل كي جي وأول ما يدخل خلاص أنا كنت هسحب الملف والورق بتاعي من هناك.
س: هل اطلعت على أى إثبات قيد من التي قدمها لك المتهم طارق محمد محمد؟
ج: لا أنا كنت بستلم إثبات القيد وساعات كان اللى بيبستلمهم مندوب النادى أو وكيل المنتخب علشان يخلص تصاريح السفر.
س: هل كان اخر اثبات قيد استلمته بشخصك أم مندوب؟
ج: أنا مش فاكر أنا استلمتهم ولا لا بس لو أنا استلمته يبقى بشخصي.
س: ما هي المدة التي قضيتها في المعهد العالى لعلوم الحاسب ونظم المعلومات بالتجمع ؟
ج: مش فاكر بالظبط بس كل اللى فاكره أني رحت مرة واحدة بس وكان يوم امتحان.
س: ما سبب التحويل من ذلك المعهد إلى معهد الفراعنة العالى للسياحة والفنادق محل الواقعة؟
ج: علشان أنا تقريبا انفصلت ساعتها فمحمد الشناوى عرفنى على طارق المصرى وقدم لى طارق ساعتها في معهد الفراعنة.
س: ما الذى حال دون فصلك من المعهد سالف البيان؟
ج: أنا عمرى ما سألت طارق أنا في سنة كام ولا انفصلت من المعهد لأنى كنت بدفع لطارق فلوس وكنت لما احتاج اثبات قيد بيجيبهولي.
س: هل كانت طريقة دفعك للمبالغ المالية للمتهم طارق المصرى على دفعات وسنوية ؟
ج: هو أنا كنت بدفع كل ترم لأن طارق كان بيقولى انه عايز فلوس على بداية كل ترم علشان المعهد وأنا مكنتش بسأله علشان باخد اثباتات القيد براحتى وهو بيعمل اللى أنا عايزه.
س: ما هو إجمالي المبالغ المالية المدفوعة للمتهم طارق محمد محمد صالح؟
ج: ـنا كنت بدفع ۳۰ أو ٤٠ ألف من أول ما دخلت المعهد وبعدين آخر مرة ٥٠ ألف وفي الأول كنت بدفع كاش ومرة واحدة شيكات وكانت من زمان وبعدين انستا باي.
س: هل قمت بتحويل ثمة مبالغ مالية أخرى للمتهم طارق محمد محمد صالح عقب استصدارك لبطاقة تحقيق الشخصية؟
ج: أيوة.. عشان طارق قلي إنه محتاج فلوس للمعهد على الترم الثاني كمصاريف الدراسة
س:هل استمرار دفعك لتلك الأموال لا يعني قيدك بالمعهد وتنقلك بين الفرق والسنوات الدراسية؟
ج: أنا اللي كنت بدفع كمصاريف وأنا كنت محتاج أني ابقى مقيد بس مش محتاج أني انجح وكان كل همي أني أفضل مقيد.
س: ما معلوماتك بشأن واقعة استصدار كارنيه خاص ببياناتك وتكليف المتهم طارق المصرى للمتهم يوسف محمد سعد والتوجه إلى المعهد وادائه الامتحانات بدلا منك؟
ج: أنا معرفش أى حاجة عن الموضوع دة ولا عمرى شفت يوسف وأنا عرفت باسم يوسف دة لما عرفت من المواقع على النت بدأت تكتب وأنه بيحضر الامتحانات مكاني.
أقوال المتهم
أما عن أقوال المتهم الأول في قضية رمضان صبحي، يوسف م س ي، فجاءت كالتالي:
س: ماقولك فيما هو منسوب اليك؟
ج: حصل بس المدعو محمد ا هو اللى اتفق معايا على إنى امتحن بدل من المدعو رمضان صبحب وسهل دخولى
س: منسوب إليك قيامك بانتحال صفة شخص يدعى رمضان صبحي ومحاولة الامتحان بالمعهد بدلا منه؟
ج: الكلام ده حصل بس أنا عملته بدون مقابل
س: ما هى صلتك بالمدعو رمضان صبحي رمضان؟
ج: مفيش علاقة
س: هل لديك أقول أخرى؟
ج : لا.. تمت أقواله
وتعود قضية رمضان صبحي إلى شهر مايو 2025، بعدما تم ضبط شخص يؤدي الامتحان بدلا من رمضان صبحي، في الفرقة الثالثة بمعهد الفراعنة للسياحة والفنادق بأبو النمرس، وقال مقدم البلاغ، إنه اكتشف محاولة الطالب أداء الامتحان بدلا من اللاعب خلال مراجعة تحقيق الشخصية، لتقرر الإدارة للتحفظ عليه، وتحرير محضر بالواقعة.
